广州有种夜景，叫宵夜档
宵夜，系填补长夜嘅空虚、安抚骚动嘅五脏嘅最佳娱乐活动。特别系岭南地处亚热带、昼长夜短、炎热湿闷，一早一晚更适合岭南人外出活动，所以饮茶同宵夜成为咗广东人两大爱好。
关于“宵夜”你又知道几多？
“宵夜”系咪等于“夜宵”？
“宵夜”同“夜宵”区别唔大，都可以指夜间进食嘅食物，而“宵夜”仲可以做动词，指夜晚出去食嘢呢个活动，“夜宵”又可以指时间好晏。
另外，“夜宵”系书面语，“宵夜”更加口语化，广府人使用频率较高。
不过“宵夜”一词虽然喺广东地区用得多，并唔系出自岭南，“宵夜”系“消夜”嘅雅称，自古就已经存在。宋人《梦粱录》曾经记载过：“除夕，内司意思局进呈消夜果子盒，盒内簇，诸般细果。”
“宵夜”原来起源于妓院
最早嘅宵夜指嘅系晚饭，而且系由妓院提供嘅晚饭。
明清朝系广州娼妓业兴盛时期，珠江长提一带花艇相连、莺歌燕舞，妓女每日都系花艇迎接客人。而嗰时嘅青楼规矩繁杂，嫖客睇中妓女，唔系好似电视剧咁随便就同花姑娘共度一宵，必须要花一番心思。
首先“打茶围”，就系青楼准备好瓜果点心，妓女同客人倾计谈情；然后再“叫局”，可以叫酒局、牌局、戏局；最后就系戏肉——“执寨厅”。
“执寨厅”就等于一餐丰富奢华嘅宵夜，嫖客同妓女如同情侣一样摆酒设宴，邀请朋友捧场，嫖客同妓女当众表白定情之后，先可以风花雪月。
▲《胭脂扣》十二少“执寨厅”之后，送畀如花一个对联花牌做定情礼：“如梦如幻月, 若即若离花”。
后来唔知系边个嫖客或者妓女灵机一动，将“宵夜”用嚟指代呢种食俗活动。虽然广州青楼逐渐式微，不过“宵夜”一词就流传落嚟，一直用到依家。
广东宵夜档曾经称霸上海
民国时期，广州本土宵夜档几旺就唔使讲啦，不过仲有一个城市嘅人，同样好中意广东夜宵，就系上海啦！从19世纪开始，就有广东人陆续去上海开粤菜馆，粤菜好早就喺江沪地区扎根。
上海开埠之后，各菜系蜂拥云集，进驻上海，而广东人为咗提高粤菜嘅竞争力，独辟蹊径，喺上海开宵夜档！
上世纪二十年代，上海嘅粤菜馆几乎清一色都系做宵夜，由于占据咗晚间嘅消费空白点，出品又有保证，所以间间宵夜档都赚到盆满钵满。
如《沪江商业市景词》之《宵夜馆》所讲：“馆名宵夜粤人开，装饰辉煌引客来。”即系喺上海，一提到宵夜馆，就肯定系广东人开嘅。
呢啲驻扎上海嘅宵夜档同广东本土嘅有所不同，佢哋会将宵夜当正餐嚟做，做嘅往往系大菜，比如：茄汁牛肉、红烧乌鱼等。
广州有种夜景，叫宵夜档
众所周知，日头同夜晚嘅广州系两个唔同嘅城市。
日头，广州街头可能水静河飞，但系夜幕降临之后，走鬼档、宵夜档慢慢蒲头，好快昏暗嘅街道亮起点点灯光，伴随住食物嘅香味、食客嘅交谈声，共同构成独特嘅广州街头夜景。
难怪有人话，广州夜越深，街越旺，深夜先系“食在广州”嘅高潮。咁唔知，可以令你毫不犹豫落街去食嘅宵夜，又系边样？
系一碟爽滑入味、镬气十足嘅干炒牛河？
抑或一碗软绵甜蜜嘅糖水？
定系街头惹味嘅烧生蚝、蒸元贝？
又或者系同三两知己饮餐夜茶，吹水倾计？
